شارع الترام

شارع الترام

ياما مشيت فيك
و عديت
يا شارع أحلامى
جواك عمرى عدى
و أحلى أيامى
جواك عمرى فات
بالدقايق و الساعات
جواك حلمى اللى مات
و انت اللى دفنته قدامى

أخاف
أخاف يا طريقى تنسانى
ياللى فيك أول ما شفت
شفت أنسانى
شفتنى كتير ماشى وحدى
و لغيرك عمرى ما بحكى
و اخاف فى يوم أنساك
فى يوم شمس طالعة
يوم أفكارى والعة
يوم أحلامى قلعة
يوم حب الامتلاك

ياللى انت حافظ خطاويا
ما نسيتك يوم
و مهما السنين معدية
معايا فى كل يوم
أحلامنا عمرى ما نسيتها
لأنك معايا لقيتها
و زيى خبيتها
بين الشموس و النجوم
رغم السحاب و الغيوم
فاكر كنت أجيلك وقت اللزوم

لم أعرف نهارك من ليلك
لم أعرف لما قلبى معديلك
و لم أنسى فى ليلة ضى قناديلك
و بقولك شد حيلك
دنا بلبل من بلابيلك
و هيعدى عمرى
و لازم فيوم تانى هجيلك.

إسكندرية
28/11/2004

خصام

خصام

خاصمت الأرض
عشان
على طول شدانى
خاصمت السما فوقيا
كمان
علشان سيبانى
و خاصمت البحر
عشان
باحسه عنوانى
خاصمت الناس حوليا
من زمان
علشان مش فهمانى
خاصمت صحابى
عشان
دايما تنسانى
و خاصمت حبايبى
عشان
دايما تعبانى
.. و فالاخر

خاصمت نفسى
عشان
كل مانسى اللى خاصمتهم
.أخاصمهم تانى

إسكندرية
12/8/2002

العجوز

العجوز

راجل عجوز واقف
على جنب
لابس طاقية صوف
و عنيه مدمعين

جايز يكون فيه زيه ألوف
لكن قلبه حزين
هدومه مقطعين
مرقعين
مبقعين
و الدنيا عليه بتشتى
نقط تقيلة
فأيده كيسة فاضية
كان فيها حبة فول مدمسين
متغمسين

حسيته بيقلى منين
أجيب قرش و لا اتنين
و أنا عاجز فالتسعين

صعب عليا
و أنا من ورا أزاز العربية
باتفرج عليه
كأنى فى سينما
كأنه تلفزيون
و الدنيا ماشية بألف لون
و كل يوم كون و كون
يطلع و ينزل
و الى يكون يكون

العربية
اتحركت بيا
الراجل فات ورا
كأنه ماضى و انورى
كأنى ما شفته
كأنى ما عشته
كأنى ما كنته

كنت عايز و أركبه
أأكله أكلة سخنة
و على سرير موضبه
ينام نومة حلوة
و لا حاجة تقضبه
و لا حاجة تفكره
و لا حاجة تتعبه

و ينسا أيام الشتا و السقعة
و ينسا القطع و الرقعة
و يفتكر الإنسان
اللى ما سابش نظراية واقعة

صورة

صورة

شفت صورة
بنت أمورة
فى فاترينة محل
مناخيرها صغيورة
شفايفها عصفورة
سنانها مرمورة
و من شعرها
رافعة زعرورة
قلبى وقف انشل

محل مصوراتى
على قمة شارعنا
بيفتح يوماتى
سافرنا أو رجعنا
حاطط على بابه حدوة
و شوية زينة حلوة
عالأرض مشاية خضرة
و الباب خشب مصنفر

دخلت..
مش عشان أتصور
لقيت راجل كبير
نايم عمال يشخر
كان اسمه عم أنور
صحيته بالعافية
سألنى بعينين مقفلين
إستلام وللا فوتوغرافية؟
قلتله لادى و لادى
أنا بس بسأل
عن الأمورة
اللى فالصورة
اللى على النحيادى

ضحك و قاللى
دى صورة عبير
قلت و مين عبير
دلنى أرجوك
دنا وضعى خطير
قاللى لأ
لازم تشرب عصير
قلت كفاية هموت
فجأة عالا الصوت
..و نادى عبير

سمعت صوت خبط
و صوت بيقول ميين
قاللها لأ
دة مش أخوكى حسين
اللى تاه فاليمن و فلسطين
و لا رجعشى فستة و خمسين
و لا ابنك حسين
اللى تاه فسبعة و ستين
و لا رجعشى حتى فتلاتة و سبعين
دة جدع شاف صورتك
يوم ما جيت زورتك
لما كنتى عبير
و كان يومها..
يوم التحرير

كلام العشق

كلام العشق

أنتى فكرانى نسيت
لما بتقولى قسيت
طب هنسا المحبة
و للا الجمال
و للا هنسا عيونك
اللى سألانى سؤال..
أنا ليه مشيت؟
و سؤالك حلال
يا دمعة فى عينى
و الجفن سيال
عالخد بدموعك
و القلب و إن مال
لعبية حورية
برضك لغيرك
كلام العشق..
ما يتقال

و انا ياللى جوايا كلام
لغيرك معرفش أقوله
و لو قلته لغيرك هيبقى
مالوش فالمعنى مدلوله
طب قولى أنتى
مسمحانى و للا لأ
و انا بكيت
و الدمع فالجفون نازل..
حرق

ما بقتش مستحمل فراق
و الغربة خداعة
بتقتل الأشتياق
و انا جوايا قايدة نار
و طعم الحلق..
حراق

تعبان يا امى بدونك
مشتاقة عنيا لعيونك
مشتاق لضمة دراعين
ترجعلى من حنانك لحظة
مشتاق أطفى الحنين
مشتاق لكل لحظة

ما تقوليليش ما ترجع
طيب يامة بعد مارجع
و أشوفهم بيقطعوا فيكى
و أنا و أنتى و الكل عارف
أنتى حاميكى حراميكى
ببقى عايز أكلهم
ببقى عايز أحميكى
و القلب قايد
و العقل رايد
بس الكف متقايد
و اللى عارف أنى أبنك
بيبقالى ف كرهه زايد
و نكسر فبعض
و ولا نتحابب
و لا نتحايد
و تفضلى أنتى اللى ضايعة
و نفضل أحنا
فالعند نتزايد..

طريقي

طريقي

ظللت أسعى لأكون أنسانا سويا
فغصت إلى أعماق الجنون
عندما تحدثت بكلمات كثيرة لأبرر
وجدتني أتفوه بكثير من الحماقات
رفعت راسي وادعيت أني أعي ما أقول
فانفض من حولي السامعون
و عندما أدركت الخطأ
كان هو ما يجب أن أقول.

سعيت وراء الحقيقة عمر طويل
لزمن طويل كانت شغلي الشاغل
و لم أصل لها أبدا ٌ
سلكت طرقا وعرة
و تعرّقت كثيرا ٌ
قد أكون أقتربت منها خطوات
و قد أكون ابتعدت عنها أميال
لكني تعلمت شيئا واحدا ٌ
واكتفيت به

قد لا أصل للحقيقة ابدا ٌ
لكن يكفيني شرف المحاولة.

أسكندرية
4/2/2004

قضية البحر

قضية البحر

أزرق لونك يا بحر
و ممدود قدامى
قدامى مراكبك
و أمواجك بتشرش على أحلامى
و بتضحك يا بختك
دى وشوشتك سامعها فودانى

ورايا ناس كتير و زحمة
ورايا الدنيا بقت لخمة
و لما انساك و ارجعلك تانى
بتنسينى يا بحر حرمانى

بتنسينى أيام بعيد عنك فيها
بتنسينى الدنيا بسواقيها
و حكاويها
بتنسينى ناس ماعرفونيش
بتنسينى أحزانى حاضرها و ماضيها
بتنسينى حياة ماعشتهاش
بتنسينى أفكار عمرى ما هرضيها

قضية المكان و الزمان
قضية كل الأحزان
قضية شىء عدى و كان
قضية عمر عشته من زمان
قضية لحلها عايزة قاضى و ترجمان
قضية أمانة قضية
قضية أمانة إيمان

لو حاسس انك زهقت
أنا يا بحر مازهقتش
من كتر حبى ليك
أنا جنبك مانمتش
لكن بقولك يا بحر ماتقلقش
القضية لسة ليها ألف وش
و اللى ينسى أنه قاضى
يبقى جحش
واخد الدنيا دى هبش.

اسكندرية
19/10/2004